ليلى و الذئب

على طريقتي الخاصة

الشخوص: أنا, رشود ابن اختي, الذئب, أم الذئب, جدة الذئب, ليلى
الحبكة: كنا قاعدين ذات ليلة و رشود المشاكس ابن اختي مش راضي يروح ينام, جننا و هو ينطنط من زاوية لزاوية عنده طاقة مش طبيعية الولد ما شاء الله عليه. انا كنت متبطح عالكنباي اللي قبال التلفزيون و تهورت بشكل غير متوقع و حكيتله تعال احكيلك قصة ولك. و هنا بدأت الحكاية
- صلي عالنبي خليني احكيلك القصة
- اللهم صلي
- وحد الله
- كيف؟
- قول هيك, لا اله الا الله
- لا اله الا الله
- كان يا مكان في قدم الزمان و سالف العصر و الأوان ذئب زغير, اجت امه يوم الجمعه صحته من النوم و حكتله روح يا ولد جيبلنا حمص و ارجع بسرعه اليوم عيد ميلاد جدتك بدي اياك تروح توديلها باقي الكيكة اللي جابلنا اياها ابوك من المخبز مبيرح
- تشيز كيك؟
- لأ يا خالو مش تشيز كيك, كيكة ع برقدان جابها ابو الذئب من المخبز و هو مروح من الشغل, زي اللي جبناها في عيد ميلادك
- المهم يا رشود يا حفيظ السلامة راح الذئب جاب حمص و افطروا الجماعه و حطتله امه الكيكة في شنتة المدرسة و حكتله دير بالك يما انت آخر العنقود عندي و بقدرش استغني عنك , اطلع في باص المؤسسة مش تطلع بتكسي بعدين تطلعلك ليلى و توكلك
- أوووف و بعدين معاكي يا حجة بدك تضلك تحكي دير بالك ع حالك و من هالسوالف؟ انا ذئب ازعر و قد حالي شو بتفكريني ذئب بوبو؟
- طيب يالله روح بس كتر حكي يوم من الايام بتعرف يما قلب الام زهرة لا تذبل, المهم الذئب حمل حاله و وجه عند دار جدته
- طلع الذئب عالشارع الرئيسي و أشر لأول تكسي شافه, بس التكسي ما وقف
- أشر الذئب لتاني تكسي بس ما وقف, التالت كمان ما وقف, العاشر وقف
- سلام عليكم, سير على بيت جراند ماذر مال انا؟
- لاااء ما اقدر ما اقدر بعيد انا والله ما في فطور
- يا زلمة اطلع بس بعطيك فلوس زيادة
- لا لا ما اقدر انا هوون جوة مدينة ممكن سير برة بعيد
- طيب اقلب وجهك الحق مش عليك, و نزل الذئب من التكسي و أشر لتكسي ثاني
- اشر للتكسي ال11 ما وقف, ال12 ما وقف ال13 ما وقف, ال28 وقف
- سلام عليكم, سير على بيت جراند ماذر مال انا؟
- سير بدون ادداد
- سير بدون ادداد خلصنا
- طلع الذئب في التكسي و حط الهاند باج تبعته و اخد راحته في الكرسي الخلفي
- ليش ما في تكسي وقف هسه؟
- ما في الحين درويل اكل نوم صلاة
- طيب سير سيدا لا تروح طريق قريبة روح طريق بعيده
- يس سير
- مشي التكسي في اول جسر و التاني و طلع ع شارع فرعي ووقف
- ليش انت وقفت؟
- تطلع الشوفير في المرايه و حكى للذئب انا ابغى آكل انت... انا ما في فطور
- شو توكلني ما توكلني؟ ولك انا ذئب و انت دريول هندي
- انا مو دريول هندي سير, انا ليلى ولك
- ليلى؟ تشرفنا, ليش عاملة بحالك هيك؟
- كانت الآنسة ليلى طالعه تدور على أكل لانها نامت ليله مبارح جوعانه و كانت خالصة من عندها الجبنة الصفرة و السنيورة و اضطرت توكل خبز حاف و شاي عالعشا
- و بعدين مع اخت هالسولافة؟ بدنا نوكل زفر يا جماعه زمان الواحد ما اعطاها منسف ولا مقلوبة و لا هش و نش... احسن اشي اتخفى ع شكل شوفير هندي و اطلع ادور على ذئاب و آكلهم
- تطلعت ليلى عالذئب بالمراي الوسطى و بعدين بالمراي اليمين و بعدين نظرة فوق الكتف الايسر و بعدين المراي الوسطى مرة تانية و حكتله عووووو
- بسم الله الرحمن الرحيم, جن و لا انس؟
- لأ ليلى
- ليلى؟؟؟ يما
- شو يما مش خايف؟
- لأ انا ذئب ما بخاف
- طيب هسه بنشوف
- و كشرت ليلى عن انيابها لتظهر ما خبأته براطمها من الشر و الرعب
- ماما.... واع واع واع... بدي ماما
- شايف انك طلعت خويثة و بتخاف كيف بس لو افرجيك طواحين العقل؟
- يما ليلى بدها توكلني يا لهوي يا خرابي يا مصيبتي .. تفو تفو تفو الشر برة و بعيد
- لا تخاف هسه ما بدي آكلك هسه بدي أخطفك و اطالب اهلك بفدية
- اهلى طفراينين ما معهم يدفعوا, ارجوكي يا ليلى نزليني انا مشحر مش شغل مخافر ابوي طول عمره ماشي الحيط الحيط و يا رب الستيرة والنبي حدعيلك في قيام الليل ابوس رجلك تنزليني مشان الله
- ما بنزلك لازم آخد فدية بدالك او آكلك فش عندي يما ارحميني, شو ليلى عالفاضي
- لا حول و لا قوة الا بالله, هسه جدتي بروح عيدميلادها و انا هوون. لو اكلتيني مين بده يوديلها الكيكة؟
- ها, الكيكة؟ انت ماخد كيكة لجدتك؟
- اه والله ابوي جايها مبيرح من المخبز و هو مروح من الشغل
- طيب لو رحنا هسه ع جدتك فكرك بتطعمينا من كيكتها؟
- اه اكيد
- لعاد بصيرش نروح و ايدنا فاضية, لازم نروح نشتريلها شغله من الستي سنتر
- لا خلص مسامحينك يختي بدناش هدية
- لا والله غير نجيبلها هدية شو بدك انت انا و جدتك بنتفاهم
- و راحت ليلى و الذئب الى الستي سنتر
- شو نوخدلها فكرك؟
- خديلها علبة عيدان تنكيش دنين بتحبهم لانها طول نهارها تنكش دنيها بتفكر التنكيش بقوي السمع
- طيب هو كذلك, وصلت ليلى و الذئب عند الكاش
- أوف نسيت الفلوس في السيارة, حامل انت فلوس؟
- لا والله مش حامل بس معاي بطاقة الفيزا
- طيب ادفع و انا بحاسبك بعدين
- اعطى الذئب البطاقة للفلبنيني اللي عالكاش و مشاها الفلبنيني عالماكينة و حكاله نت ووركنج سير
- شو نت ووركنج؟ ولك لسه جديده هه شووف
- نت ووركنج سير يو كان سبيك وذ ذا مانيجر اف يو وانت
- ابوك ع ابو المانيجر هات هات لاشوف اذا معي فراطة.... خود هه كيفت هسه؟
- طلعت الشبيبه من السيتي سنتر و توجهت على بيت جدة الذئب
- لازم نعمللها سوربرايز بارتي, و انت شو رأيك؟
- مش غلط يالله انتي البسي عروس و انا بلبس عريس و بنفوت عليها و بنفاجأها
- دقوا الباب
- مين
- انا ابن بنتك
- يالله يالله هيني جاي
- دقوا مرة تانية
- مين؟
- انا ابنت بنتك
- يالله يالله هيني جاي
- و دقوا مرة تالته و رابعه و خامسه و سادسه و جدة الذئب لسه جاي
- يالله هيني وصلت
- فتحت الجدة الباب؟
- اهلا هلا مين هاي؟
- هاي عروستي الجديدة؟
- تجوزت بدون ما تحكيلي ؟؟؟ و مين كمان؟ وحده ليلى؟
- ووقعت الجده عالارض من الزعل كيف ابن بنتها بتجوز بدون ما يعزمها عالعرس توكل كيك و تشرب سفن اب, و بتجوز وحده ليلى كمان؟ يا عيب الشوم
- جيبولي الاسعاف جيبولي الاسعاف بدي اموت انجلطت
- طلع الذئب الموبايل تبعه و اتصل بالاسعاف
- استنى ساعه ساعتين تلاته مش جاي الاسعاف, كل شوي الجده ترفع راسها و تسأل: وصل الاسعاف يحكولها لأ, ترجع تنجلط
- آخر اشي زهقت رفعت راسها و حكتلهم اسمعوا انا حاطة الطبيخ عالنار و هسه بنحرق بدي اقوم اشوفه عبين ما ييجي الاسعاف
- قامت الجده و راحت عالمطبخ و دخل وراها الذئب و ليلى؟
- حكتلها ليلى بدك موساعدة خالتو؟ حكتلها الجدة اه امسكي طنجرة المقلوبة و حطيها بالسدر خلينا نتغدى كلنا مع بعض هسه
- حطوا الاكل و قرروا يعملوا عيد ميلاد للجده بعد الغدا بس الهبيلة الذئب نسي يحط الكيكة في التلاجة اول ما يوصل فخربت الكيكة و صارت خبيصة
- يا جده احنا الصراحة كنا جايبينلك باقي الكيكة اللي جابلنا اياها ابوي من المخبز مبيرح بس للاسف خربت بنعتزر منك و اجابتك غلط
- مش مشكله يا ابني روح افتح التلاجة في باقي علبة حلاوة جابلي اياهم خالك السنه الماضية جيبهم و تعال نعمل العيد ميلاد عليهم
- جاب الذئب الحلاوة و جابت ليلى الشمع و ولعوا الشمع و صاروا يغنوا للجده
- بطارية بطارية قاللي عمي عد للمية عشرة عشرين تلتين اربعين خمسين ستين سبعين تمنين تسعين مية نطوا عليك الحرامية من شباك العلية بالسكين و المنشار اطلع برة يا حمار.......هيييييييييييييه
- في نهاية اليوم اجت ليلى للذئب و حكتله انا بحبك من زمان و بشوف فيك كل الصفات اللي ممكن بنت زيي تدور عليها في الشب, شو رأيك نتجوز بما انا لسه لابسين اواعي عرس؟
- و تجوز ليلى و الذئب و اعلنوا الزفاف و عملوه في النادي الاجتماعي الاردني و نقلت ليلى كفالتها على كفالة الذئب و عاشوا بسبات و نبات و خلفوا صبيان و نبات و توتو توتو خلصت الحدوته حلوة و لا ملتوتة
- رشود, رشود وينك يا رشود؟
- فات ينام جوة
- و انا لمين صارلي ساعتين بحكي القصة؟؟
- جوز اختي: انا صارلي ساعه سامعك بتخربط في الحكي فكرتك بتحلم والله
- فكرتني بحلم... حكيتلي... فعلا كنت احلم بس العبرة من الحلم انه هاي البلاد بتشقلب الدماغ و بتعمل العاطل كويس و الكويس عاطل و بتخلى ليلى تتجوز الذئب و بتخلي الذئب يحمل موبايل و فيزا كارد و بتخلي ليلى تسوق ع تكسي و بتخلي عيد الميلاد ينعمل ع صحن حلاوة جابه خالك لجدتك السنة الماضية
- و دمتم




-
-
-