في هذه اللحظة كم أتمنى لو أنني لست مدخنا
صحيت الصبح حلقي ناشف و ماكل هوا ف عرفت اني راح ارشح رشحة ماكنةجمعت العيال الزغار عشان استجوبهم واحد واحد و على انفراد بدي اعرف مين اللي عداني .اكتشفت انهم كلهم مرشحين
البروتوكول تبع الرشح يمر بعدة مراح
لمرحلة الآدينتيفيكيشن: اني بحكي للحجة اول ما اصحى: شكلي راح ارشح رشحة مش من هوون
الحجة: مش عندك تأمين ؟؟ روح عالدكتور
ان شالله, في هذه المرحلة بقطع التدخين نهائي
مرحلة عشان تتعلم: و تتمثل انه كل واحد بشوفني بحكيلي عشان تتعلم تلبس نص كم و الدنيا لسه برد
مرحلة روح عالدكتور:طبعا الحجة عارفة اني مش راح اروح عالدكتور عشان هيك بتتصل فيي الساعة 12 الظهر تسألني اذا رحت أو لأ بحكيلها كمان شوي هسه مشغول, بترجع تتصل كمان شوي لحد ما ارجع للبيت و بحكيلها كمان شوي مشغول برجع عالبيت مش رايح عالدكتور, بحط راسي و بنام
مرحلة الحمضيات: بصحى ع صوت عصارة البردقان و الليمون, بتكون الحجة موصية الحج يجيب بكب ليمون و هو راجع, بشرب بردقان و باخد حبتين اسبرين و برجع انام, بعرفش انام من البرد و بروح بولع الصوبة و بتمدد جمبها ببلش الحج و الحجة يحكوولي عن اهمية انه الواحد يروح عالدكتور بس يكون مريض
مرحلة الفاين: في هاي المرحلة بجيب باكيتين فاين و كيس بلاستيك بحطهم جمبي و باخدهم معي وين ما اروح بالاضافة الى قطرة الديكوزال او الفايبروسيل
مرحلة نشر الغسيل: تاني يوم برضو بروحش عالدكتور, الحجة بتحكي لاختي الكبيرة اني مريض و مش راضي اروح عالدكتور, اختي الكبيرة بتحكي لاختي الزغيرة, اختي الزغيرة بتحكي لجوزها, جوزها بحكي لأمه و كل الحارة بتعرف اني مريض و مش راضي اروح عالدكتور
مرحلة التداوي ع كيفي: بعد يومين بتنزل الرشحه ع صدري و بصير اكح و هوون اكلة الهوا, بمر عالصيدلية بشتري دوا ع حسابي عشان ما اروح عالدكتور
مرحلة السطلان: بصحي بالليل و بروح عالثلاجة و بصير انكش في الادوية, باخد من كل نوع حبة و من كل قنينة بشرب معلقة, تاني يوم بصحى من النوم بس بحس حالي زي اللي ماشي ع قطن من كتر تخبيص الادوية و الهذيان. مثال: اليوم الصبح رحت عالشغل بدي افتح باب المكتب , وقفت ع الباب و صرت اكبس ع كبسة جهاز الانذار تبع السيارة, بفكر باب المكتب كمان عالريموت
مرحلة خدوني عالدكتور: في هذه المرحلة بروح عالدكتور بس اكيد مش بخاطريوحده من تنتين, بسخن في الليل و بحكيلهم يوخدوني عالطوارئ يعطوني ابرة في العضل....أو صحابي في الشغل بشفقوا علي بوخدوني عالعيادة بعد ما افقد النطق من التعب و برضو باخد ابرة في العضل و بروح عالبيت و باخد يومين اجازة بقضيهم في النوم المتواصل
مرحلة فقدان الصوت:كونه شغلي يعتمد بشكل اساسي ع الصوت( مش مطرب) ف بضطر اجيب سكر فضي اضل اقرط عشان امشي هالساعتين
مرحلة الحمو: بعد الانتهاء من جميع المراحل و قبل التماثل الكامل للشفاء, بطلعلي حمو حلوان انتهاء الرشحة و بصير شكلي زي اللي عامل هوشة
مرحلة الرجوع الى التدخين: بصير ارجع للدخان شوي شوي و بالسر خوف لتعرف الحجة اني بدخن و انا مرشح
مرحلة الحمد لله ع سلامتي: لما ينعدي واحد من و تنتقل الرشحة الى شخص آخر و أخلص منها باذن الله
4 comments:
سلامتك وما تشوف شر بس ضروري تروح عالدكتور
ولاّ عاجبك يعني تعدي البيت والبيت يعدو الحارة والحارة تعدي المدينة والمدينة تعدي البلد والبلد تعدي دول العالم ودول العالم تعدي الكرة الأرضيّة والكرة الأرضية تعدي الشمس وهون المشكلة لمّا توصل العدوى للشمس ما بكون ظل محارم فاين وهات بعدين إمسك الشمس .. أي عطسة وحدة بتروح المجرّة بخبر كان .. صحيح إنّك أناني ما تروح عالدكتور وتريّحنا يعني بلا منه بكب الليمون .. وبعدين بدري عالتنانير الميني قصدي عالنص كم ولاّ مستعجل؟ على شو بالله مستعجل بدّك لحمة روح على عبدون البلدي بسعر البلاش وإذا ما بدّك بلدي في مستورد في مكّة مول المهم يعني بلا منّه النص كم
:D
سلامتك وما تعديلنا النت الله يرضى عليك
Aulic
تسلم تسلم يا أوليك" مش هيك اسمك بنكتب" رحت ع الدكتور هالمرة لحالي و اعطاني كمشة ادوية و الحمد لله هسه تمام
نسيت مرحلة الشعر المنكوش و الأنف المقشب
بس عن جد ذكرتني بحالي
وعلى فكرة لونك بتشتغل بالحكومة في مرحلة اضافية اسمها المراكضة على نموزج طبي :)
hehehe allah b3een .. ana la broo7 3ala doctor wala 3balee .. just work m3 elatfal ele m3ee khalnee tool elwa2et mrsh7a w 3tanee mna3a la akter men noo3 men elvirusat hehehe
Post a Comment