تجربتي مع الجنس اللطيف و ارتباطها الوثيق بالمنسف / ج4

رجعت عالدار أدوّر ع جركن كاز في غرفه الخزين عشان نروح انا و فليح نجيب ديزل من الكازيه, كانت أقرب كازيه علينا ع بعد 2 كيلو و صاحبها كان واحد من جماعتنا كان ب الخليج و حوشله شوية مصاري و رجع يستثمرهن هان, قام فتح محل اواعي و انكسر لانه كل الحاره بتلبس يدلات فوتيك و كلها بتوصي ولادها اللي بالجيش تحسب حسابها يوم التزويد اول الصيف و اول الشتا
المهم دخلت غرفه الخزين و لا لقيت جركان اخضر من ايام ما كان ابوي يروح ب روفر الجيش عالدار, رفعت من فوقه صناديق الببسي الفاظيه و طلته عشان انظفه و آخذه
تسحبت تسحّب بدي اطلع من الدار خوف ليشوفني ابوي, و انه زاقطني
وين رايح معاليك, و شو بدك ب الجركن؟
لا يابا ولا شي, جارنا ابو متعب بده اياه قال بده يجيب ديزل ل صوبه البواري؟
أوف, هي صوبة البواري بتشتغل ع ديزل؟ لعاد خلينا نجيبلنا وحده أوفر
أوفر يابا؟ تري بدها كازيه تصرف علينا , بعدين بتشحبرلك الدار كلها و بتضطر تدهنا شيد كل بعد كل شتويه
معلش يابا المهم تدفوا بدل ما نولعلكوا صوبه علاء الدين و تقربطوا ب الحرامات تقربط و عالاقل بتصيروا تقحمشوا عليها خبز
طيب ماشي يابا خليني اوديله الجركن بلاش يقول بعدين انه خالي ردي مش راضي اعطيه اياه
طيب بس قله لا يطوّل بيه
طيب ماشي
المهم نفذت من بهدله مؤكده من ابوي و طلعت بره , رميت الجركن عالارض و بلّشت ادق عليه من وري عشان انزل كل الوسخ اللي بيه و انه فليح قاعدلي بالمرصاد
ولك وشو بتساوي؟
يا زلمه بدي انزل الوسخ اللي بيه, ملان تراب و حصمه
ولك اتركه خلص هو البكم النا؟
اه والله ع قولتك , ما هو ل ابو متعب النذل خليه ينظف طلمبه الديزل و يدفعله كمشة مصاري
ربطنا الجركن ب حوش الديانا ب حبل ليف و وجهنا عالكازيه بقياده اخوي فليح و انه بقولي
شغللنا هالراديو يا زلمه والله متنا من الزهق
ولك ما صرلنا 10 ثواني طالعين ب البكم صرت زهقان؟
زهقان من شوفتك انا و هه, فتح فليح ع راديو عمان و انه المذيع بقول السلام عليكم و رحمة الله و بركاته
رد عليه فليح : و عليكم السلام و رحمة الله و بركاته
ولك هو سامعك بترد عليه السلام؟
حتى ولو, هيك لازم عشان اكسب حسنات
ليش الاخ بحوّش حسنات, ما انت طول نهارك تهاوش بيي و عمرك ما رديت علي السلام
انت اخوي الزغير و مخاوي عليك, و اذا مش عاجبك انزل من الديانا و رووح جيب ديزل مشي
امري لله بس خلص اختصر مش متحمل منك كلمة ثانيه
وصلنا الكازيه, ووقفنا ع طلمبه الديزل, تعربشت ع حوش الديانا و بلشت اعبي ديزل ل حتى انتلى الجركن
و انه فليح بقول: حطلك ب نص نيره ديزل للديانا
حاضر يخوي, لوني اخذت تكسي طلب احسللي
حطيت ديزل, حاسبت و طلعنا, التزمت الصمت طول الطريق خوف ل فليح يدق فيي و نتهاوش و يمزعلي ماعيني زي المره الماظيه
وصلنا بكم الداستون, درنا الديزلات
اظرب سلف
تشك تشك تشك
تشك تشك تشك
خلص خلص اشتغل
مبروك
الله يبارك بيك, تشوف ل كناينك ان شالله
طب يالله قب بلا كثر حكي بلاش تنكتل اليوم
امري لله و شو بطلع ب ايدي يا فليح, بيجيك يوم بتصير تحكي يا حسره ع كل لحظه قظيتها مع اخوي ظاعت هيك
من هسه بدي اقول يلعن ابو كل دقيقه شفت بيها وجهك
ماشي, دخلت الدار تسحب برظو, غسلت ايدي و حلقت لحيتي و لبست بدله فوتيك لسه مرطبه عن الحبل و سلمت ع امي و ابوي و قلت يا هادي
سمّيت بالله و شغلت البكم و مشيت على تساهيل
طلعت من الحاره و لقطت الشارع الرئيسي وانه ختيار بيأشرلي
توخذني ب طريقك يا شب
اطلع يا حج
طلع الختيار و بايده سيجاره هيشه
هع هع هع
سلامتك سلامتك وشو مالك؟
لا ولا شي انت ابن ل ميين ياشب؟
انا موستنج ابن ايو فليح
ايوه, ابو فليح اللي ساكن في الحاره الغيدانيه؟
ايوه هو؟
شلونك و شلون.. هع هع .. ابوك؟
الحمد لله ملاح الله يسلمك.. و شو مالك بتقحقح يا حج؟ وشو بدك ب الهيشه ما وراها غير المصايب, دخن صاير احسللك
وشو هاظ الصاير؟
هاظ دخان ملفوف جاهز و محطوط ب باكيتات بعد,, و طلت بوكيت الفيلادلفيا تبع ابو متعب من تابلو البكم و ولعت سيجاره
هع هع .. أي والله هاظا بلشه و مين بلفه هاظ الدخان؟
والله ماني عارف هاظ بلفوه ب عمان و بجيبولنا اياه هان, جربلك سيجاره
اخذ الختيار سيجاره وولعها من سيجارة الهيشه تبعه و زتها
ايه, والله المجه منها بتسوي دلمين ارظ
صادق والله يا حج
عندك عندك..هع هع .. انا رايح عالتكتور معي ظيق تنفس ابصر من ايش؟
يمكن من البندوره لاني مره قريت بالجريده انه بيها نيكوتين
ها ,, اه والله التين نازل عندنا من عيون الشجر, اذا بدك تعال عبيلك بكسه عن الشجره
صفيت عاليمين و نزل الحج,, تسلم يا موستج,, سلم ع ابوك
الله يسلمك يا حج

رميت الاول و الثاني و انا مرتاح نفسيا لاني خليت الختيار يقتنع ب الدخان الصاير, هيك بصير يطعيني ابو مفلح تبع الدكانه سيجاره كل اسبوع لاني جبتله زبون جديد
شغلت الراديو و انه باقي محطوط ع مونتي كارلو
والله يا ابو متعب, بتسمع مونتي كارلو كمان؟, هاي آخرتها أي مليح اللي بكمك ما بلقط راديو سوى كان تقلّطت عالمزبوط
حكيت خليني ازر عالبكم اشوف شو بطلع منه, زدت شويه ديزل و انه محله, سلخت الدعسه عالاخير و انه بيقول تك تك. حكيت خليني اخفف الدعسه شكله هاظ البكم هامل زي صاحبه
صارت الساعه تسعه و نص و انا لسه ع باب جامعة اربد الأهليه, حكيت خليني اميّل اشتريلي كاسة شاي خماسين من الاسترحه
صفيت و نزلت, اشتريت شاي و رجعت و انه واحد واقف عند البكم
قديش البطيخ يا معلم؟
ها. . أي بطيخ؟
شو البكم هاظ مش الك؟
لا الي الي
لعاد وشو اللي ب حوشه مش بطيخ؟؟
انا اجتني فكره ب سرعه البرق,, خليني ابيعلي شوية بطيخ من بطيخات بلكي بصرفن علي اذا حبت البنت اللي رايحلها تتغدي او تقعد ب مطعم هيك ولا هيك و رحت فتحت التابلو و طلت شبرية ابو متعب
الكيلو ببريزه عمي, و عالسكين يا بطيخ
اول زبون اجى, و الثاني و الثالث ل حتى بعنا ب خمس نيرات
نعمه و فظل, خليني انطلق هسه
دزيت شريط ل محمد عبده باقي مخبيه ابو متعب عن ولاده تحت الكرسي و صرت اغني معاه
صوتك يناديني... يناديني تذكر
تذكر الحلم الصغير.. وش دار من طين و حصير
و قمره ورى الليل الظرير.. عند الغدير
و ان هبت النسمه تذكر