سلامات يا شبيبه كيف الأخبار بدي اسولفكوا سولافه صارت معاي مبارح, بس اول اشي حابب اوضحلكوا انه انا مش ضد حدا ولا بكره حدا, بالعكس بتصرف بما يمليه على ديني و أخلاقي و أصلى و تربايتي و المنطق كمان
المهم متعود أنا و الشباب صحابي نطلع كل خميس, و كوني خريج الاردنيه و هم كمان ف بنحب نطلع حوالين الجامعه مبارح قعدت انا و شب بنستنى باقي الشباب في الماكدونالدز اللي قبال الرئيسي, تفاجأت انه في رجل أمن في الماكدونالدز بس حكيت مش مشكله يعني عادي الامن مطلوب عشان الزباين, بس اللي لفت انتباهي انه الزلمه حامل قنوه و المسدس على وسطه, يعني نافش ريشه من الآخر تقول عميد في المخابرات المهم كنا قاعدين في الطوايل اللي عالبرنده , فجأه انفتح الباب و طلع تبع الامن جارر وراه ولد زغير يالله 13 سنه بره الماكدونالدز, طبعاً الولد يا جماعه معاق يعني منغولي و داخل عالماك عشان يبيع بلالين الولد رمى حاله عالأرض و صار يعيط, الامن صار يدفشه برجله و يدعس في بطنه و يصيح عليه و يقول له قووم أنا تفرجت بالناس, ما حدا فرقت معاه, طبعن قبعت معاي كل واحد حامل كوم شعر على وجهه و بتفرج مش سائل شو صايرالمهم قمت للامن و حكيتله اترك الولد حرام عليك معاق يا زلمه, و مسكت الولد و قومته عن الارض و حكيتله روح من هوون هسه, رجل الامن ما عجبه بس ضله ساكت و صار يهذرف مع حاله بصوت واطي كان بودي انه الامن يتفلسف او يفتح تمه عشان يكبر الموضوع و تصير مشكله و افرجيه قيمته بس يمكن منبهين عليه ما يتمشكل مع الناس سؤالي يا جماعه: مافي مشكله في الامن, بس ازا استغل وظيفته و استتفه العالم و شاف حاله اشي لا يقهر لدرجة انه صار يجحر فيي طول القعده و ضله رايح جاي من قدامي لحتى طفشت من الماك و رحنا تعشينا في الضيعه استفساري موجه لاداره الماكدونالدز: هل يجوز هذا التصرف؟, هدف الامن هو الحفاظ على امن الزبائن و ليس ازعاجهم و تطفيشهم, كان ممكن تضحكوا عالولد المعاق و تشغلوه عندكم اي شغله ينظف يكنس في كراج السيارات بدل ما تبهدلوه و تبهدلوا حالكم معاه او على الاقل تعطوه سندويشه و ببسي و تطلعوه بأدب و اخلاق بدون دفش و مسبات, خلينا نصير كبار يا جماعه و نقدم الخدمه بالمستوى المطلوب و نحافظ على ستاندرد معين في تعاملنا و اخلاقنا مع العاقلين و المجانين, لانه احنا شعب متعود عالنخوه و مساعده الناس المحتاجين, يمكن لو صارت هاي المشكله في اميركا ما راح تأثر بس عنا هوون أتوقع انها ظاهره تستحق التوقف عندها و اشعال سيجاره ثم التفكير العميق فيها
شكراً
1 comment:
ظاهرة التسول في المطاعم في عمان و خاصة الامريكية منها مثل ماك و ب ك و هارديز و ك ف سي الخ... قد تزعج رواد المطعم و لكن شخصيا انا ما بنزعج لانه في منهم عنجد بيكونوا محتاجين و كمان بينهفو و بيضحكو و في اخر زيارة مرة وحدة صغيرة كانت تبيع قران ما قبلت انه تأخذ مصاري الا اذا اخذت شيء من يلي عبتبيعه فسبحان الله حتى الصغار صار فيهم نخوة و بدهم يجيبو مصاري بعرق جبينهم و مش بس شحدة
موقف الشرطي الله يسامحه بس!!!
Post a Comment