قصة رمضانية

مش طبيعي اللي صار
راحت علي نومة و راح علي الفطور
بس مش اي نومة اللي راحت علي, صلوا ع النبي ل احكيلكوا شو صار
بلشت السولافة الساعة 12 الضهر طلعت من الشغل عشان انزل ع شارع المحطة اشتري شوية شغلات للسياره
المهم كانت أزمه و شمس و لفيت 98% من المحلات و انا بدور ع طلبي
خلصت اموري و تجهزت اني ارجع للبيت, تفرجت ع الساعه ف كانت 4 و نص و خمسه و كنا معزومين ع الفطور عند ناس قرايبنا
بذكائي الخارق اكتشفت انه ازا رجعت ع البيت بدي 45 دقيقه يعني بكون ضايل للفطور اقل من ساعة ما راح الحق اسوي فيهم اشي و لا انا طالع مره تانيه عند الجماعه
اتصلت ب ابوي حكيتله انا ما راح اقدر ارجع للبيت بلاقيكوا عند الجماعه, حكالي ولك ارجع الله بعينك بس فهمته اني ما راح الحق
اللي صار اني شغلت السياره و وقتها تزكرت انه راحت علي صلاة الظهر, ف قررت اروح ع جامع ب الطريق عشان اقضي الظهر و اصلي العصر و بعدين انطلق
صفيت السياره ع باب الجامع و انا اكاد افطس من التعب و رجلي مش قادرين يحملوني, توضيت و صليت الظهر ثم العصر
هسه في المرحله هاي قررت اني اقعد في الجامع 5 دقايق بس عشان اتريح من التعب و اللف و الدوران ب الشمس اللي سويته اليوم
ب لحظه سهيت و غفيت
صحيت ع صوت زلمه كبير و ايد ع ضهري بحكيلي تفضل يا شب تمر هي أذن المغرب و قوم توضى عشان تصلي المغرب معنا
طبعا انا عندي عادة اذا واحد لمسني و انا نايم بلتمس رسمي يعني بصير ارافس, ربكوا حميد لما رافست ما طبيت ب الزلمه
هسه انا صحيت من النوم و انا مش عارف انا وين, التخمت مبدأيا و صرت اسمّي بالله بسم الله بسم الله بسم الله
ل حد ما اكتشفت اني ب جامع ب طبربور مش متزكر شو اسمه
مديت ايدي ع المحفظه و التلفون و لما ما لاقيتهم كنت ع وشك اصرخ بس تزكرت فجأه اني تركتهم ب السياره عشان اعرف اتوضا
طلعت ع السياره لقيت التلفون عله 19 مكالمه مفقوده من ابوي و امي و الجيران و القرايب و عمامي اللي ب امريكا و المانيا و خواني اللي ب الخليج يعني عمره ما حلم تلفوني ييجيه هالمكالمات
حكيت مع ايوي و سردت له القصه طبعا ما قدر يمسك حاله عن الضحك و حكالي طيب تعال خلص بخليلك اكل
اكلت تمر و شربت مي و صليت المغرب مع جماعه و رحت عند الشبيبه
استقبلوني استقبال حار و ما ضل حدا ب البيت او ب الحاره و على نطاق دائرة نصف قطرها 15 ميل ما ضحك علي و تخوّت علي عالموضوع
تخيلوا البني آدم شو مسكين ؟؟ بينه و بين فقدان الذاكرة و الجنان شعره وحده
كل واحد يدير باله ع حاله ليصير فيه اللي صار فيي , اقل ما فيها انا نمت و نسيت حالي ب جامع بلاش واحد يعملها في مكان تاني
و السلام مسك الختام