حكاية كل صباح

تدور احداث هذه القصه القصيره من ساعه ما طلعت من باب دارنا في طريقي لتوصيل ولاد اختي للروضه و بعدين اكمال طريقي للعمل
الشخوص: أنا , عون ابن اختي, توتي بنت اختي, محمد الوكيل من على اثير راديو فن اف ام
المشهد الاول و الاخير:
انا فاتح باب السياره الخلفي و الولاد بدهم يدخلوا
انا: يالله يا شبيبه اطلعوا بس ما حدا يدعس عالفرش
توتي: احنا شاطرين ما حدا بدعس عالفرش
عون: خالو توتي دعستلك عالفرش
أنا: طيب معلش اطلعوا هسه تأخرت
شغلت السياره
عون: خالو قديش الساعه؟
انا: 8 الا 5
عون: خالو طيب ليش انت دايمن بتتأخر؟
انا: خالو هيك ل حتى اجهز حالي و اطلع عالشغل
السياره تحركت
محمد الوكيل: هل تعلم عزيزي المستمع ان حاسة التذوق عند الفراشه موجوده في سيقانها الخلفية؟؟؟
وسيم: ولو......
عون: خالو طيب ليش سيارتك فيها ساعه؟
انا: كل السيارات فيها ساعه
توتي: سيارة ابونا ما فيها ساعه عمو
عون: اسمه خالو مش عمو
توتي: خالو عمو
عون: خالو طيب ليش انت دايمن بتمشي شوي شوي الصبح؟
انا: عشان تحمى السياره يا خالو بعدين بتخرب
انا: سكوتر هوندا الهوندا سكوتر هوندا سكوتر هوندا
عون: انا بدي اشتري سكوتر كبير كبير اسرع من سيارتك
انا: طيب بتخليني اسوقه؟
عون: اه بخليك لانك صاحبي
توتي: عمو انو اقوى الاسد و لا الحمار؟
عون: الاسد يا هبله, مش الاسد اقوى خالو
انا: اه الاسد يا حبيبي اقوى من الحمار
محمد الوكيل: و هل تعلم عزيزي المستمع ايضا ان الانسان هو الكائن الحي الوحدي الذي ينام على ظهره؟
انا: يقطعك ما احلى برادتك
عون: خالو مع مين بتحكي؟
انا: مع حالي يا خالو
عون: طيب خالو انت راح تجيبنا من المدرسة اليوم؟
انا: لأ خالو انا راح اتأخر في الشغل
عون: طيب خالو انت ليش بتروح عالشغل؟
انا: عشان اجيبلك شيتوس يا خالو
توتي: عمو انا بدي شيتوس
عون: و انا كمان
انا: ان شالله بس ارجع من دوامي بجيبلكوا
محمد الوكيل: بتعرف قديش سرعه الضوء يا وسيم؟ ثلتميت الف كيلومتر بالساعه.. يعني زي من هوون ل دار اميليو
وصلنا الروضه
انا: يالله خالو انزلوا ع مدرستكوا,, بس لا تدعسوا عالفرش و تنسوا شنتاتكوا
عون: من بابي
توتي: لأ من بابي
البابين انفتحوا
عون و توتي: باي خالو.... عمو
نزلت الشبيبه و سكرت البواب
انا: لا حول و لا قوة الا بالله نسيوا شنتاتهم
فكيت حزام الامان و نزلت اخدت الشنتات
انا: صباح الخير مس
المس: صباح النور
انا: نسيوا الشنتات
المس: ههه كالعاده
انا: يالله سلام
طلعت بالسياره
محمد الوكيل: سمعنا وحشتني يا وسيم هاظا ايميليوا بيظل يلعب بالكبسات والله ما هو عارف مكانهن
وسيم: راديو فن... الوحيده التي ترافقك اينما كنت