زعفران

سلامات
زي ما الكل بعرف انا الايام هاي عايش لحالي و اهلي مسافرين
و الوضع انه اخواني بعزموني عالغدا مرات عشان ما في حدا يطبخلي او بطبخ لحالي في الغالب
المهم هي آخر نهفه صارت معاي قبل سويعات
عازمني اخوي و اتصل معاي عشان يأكد علي. انا سألته من باب المجامله بدك اشي و لا سمعت مرته بتنادي بتحكيله خليه يجيبلنا زعفران
و لا شو بدكوا ب طوله السيرة رحت عالسوق و نزلت عالعطار و دخلت بقوه و ثقة
مرحبا ابو مهند
اهلين حبيبي
عندك زعفران
عندي اه قديش بدك؟؟
حطّلك كيلو
الزلمه انهبل, و لا بقوللي قديش مره ثانيه؟
قلتله كيلو كيلو بلاش ينقص و نلتحق
حبيبي ما فيش عندي كيلو
ليش من غير شر يا ابو مهند سلامة قيمتك محل ما شالله طويل عريض فش عندك كيلو زعفران؟
لا والله من وينلي كيلو
طيب لعاد خليني اشوف جارك
رحت عالعطار التاني
عندك زعفران معلم
عندي
وزنلك كيلو طيب
الزلمه فرط من الضحك: كيلو؟؟
اه كيلو عمرك ما بعت كيلو زعفران؟
لا والله, طيب انت بتعرف قديش الكيلو؟؟
لا والله قديش؟؟
معك من 500-700 دينار
انا بلعت ريقي: ول شو هادا كاين دهب؟؟
متأكد انك بدك زعفران؟؟
طبعا في المرحله هاي انا صار همي الوحيد اغطي ع تياستي و الاقي اي حجه
مش عارف والله فرجيني ياه لو سمحت
فرجاني ياه و حكيتله لا والله شكلي مخربط
قاللي لعاد شكلك بدك كركم
الله ينور عليك حطلك كيلو كركم شكلي انا مخربط
اخدت الكركم المهم و رجعت ل ابو مهند
ابو مهند اعطيني طيب ب ليره زعفران خليني اجربه و اذا عجبني برجع باخد كيلو
و قام الزلمه اعطاني كويس ( تصغير كيس) فيه حبتين عشب احمر
يسلمو ابو مهند
الله معك حبيبي